SukhMukh ki Kahaani: Ek Virasat, Ek Swaad, Ek Sanskriti
Ek chhoti si rasoi, jahan se bhartiya masalon ki khushboo aur hansne-hasaane ki goonj sunayi deti thi—wahin se shuruaat hui SukhMukh ki kahaani. Yeh sirf ek brand nahi, balki ek pyaar bhari virasat hai.
Sabse pehle, hamari pyari daadi Shrimati Shanta Bai ne in lajawab Mukhwas ka nirman kiya tha. Amla, Keri, Chuara aur Gulab jaise swadon se taiyaar kiye gaye in mukhwas ko unhone apne 70 saal ke anubhav se sanwaara. Har tyohaar par, jab hum bachpan mein unke ghar jaate, toh in swadisht Mukhwas ka intezaar sabse zyada hota tha.
Yeh parampara humari maa, Shrimati Sarita Devi, ko mili. Pichle 35 saalon mein unhone in paramparaagat swadon ko aur bhi nikhara—Paan, Vakal, Nariyal, Nimbu, aur Kharbuj jaise naye swad ke saath. Har parivaarik milan mein yeh Mukhwas ek star ban jaate.
Aaj hum, Shanta Bai ki potian, iss parampara ko naye roop mein duniya ke samne la rahi hain. Lekin naye ke naam par kuch nahi badla hai—hum wahi purani gharelu recipes la rahe hain jo aaj bhi har bhartiya ghar mein kisi na kisi roop mein jeevit hain—bas ek naye andaaz mein.
SukhMukh ke har bite mein milta hai:
Ghar ka swaad, jo sadiyo se chala aa raha hai
Sehat aur swaad ka perfect balance
Aur sabse khaas—sirf mahilaon dwara banaya gaya har ek Mukhwas, ek chhoti si koshish auraton ko sashakt banane ki
Chahe tyohaar ho, mehmaan aayen ho ya roz ke khane ke baad ki chhoti si masti—SukhMukh har pal ka swaad ban jaata hai, ek kahaani jise chakhna bhi hai, jeena bhi hai.
